Wednesday, February 18, 2009

PANGAIT OH PANGAIT

Aiyoo...apa pasal tiba2 sumua orang cakap pasal Pangait nih? Saya butul2 trauma sama cerita nih. Sampai sekarang (ish..bikin malu juga ini) sia masih lagi tidak selesa dangar perkataan pangait. Masih lagi tiap2 malam sia pigang leher sia seblm tidur. Mcm2 sorita pangait dulu2. Urang bilang pangait salalu naik lori yang warna hijau tu. Cerminnya mcm galap sidikit. Bila ada jambatan mau dibuat, beberapa biji kapala misti dicari. Di bawah jambatan tandik dulu, mimang ada batu sungai yg bulat-bulat disusun dalam sarung dawai (mungkinlah dawai), kononnya di celahan batu itulah ada kapala urang yg malang. Tujuannya untuk menguatkan jambatan supaya tidak mudah roboh. Tiap2 kali saya menjenguk tingu bawah, misti sia jeling2 itu batu2. Oleh kerana talampau takut, kalau sia jalan kaki balik rumah, nampak seja lori , sia tarus lari batapuk dalam semak2 di tepi jalan. Silakak ...banyak masa sia habis di tangah jalan pigi batapuk. Dulu banyak kayu balak banyak la luri kaluar masuk Tandik. Lagi bikin takut, mama sia becerita sama jiran..kononnya pangait mau cari kapala porompuan, lagi cantik lagi bagus..(aikkk...parasan santek la aku tu pula dulu..hahahaha) Kanapa ah misti kapala porompuan? jangan2 hantu di bawah jambatan tu terdiri daripada hantu jantan yang biang keladi!!! Oppss...talabih suda. Tapi sia yakin teda lalaki yg tersinggung kalau baca ini. Yang rasa diri dia hantu seja akan marah....jangan marahhhh...nanti kana juallllll....hua hua hua

5 comments:

  1. hahaha..nasip baik ko suda post ini tajuk..
    furen,ko tau kah siapa pangait@soge'eh di Tandik?
    time budak2 dulu yg sia tau ada 2 urang sija..cukup terkenal.. si guntarak sama otuk..hahahaha.padahal diurang bukan pangait butul2 bah...kami pula kalu pigi sikul,misti ramai2 supaya tu pangait kunun inda barani manyarang..ada kawan kg yg bawa karambit lagi..kami pula misti ada lastik tu dalam beg..cissss..

    ReplyDelete
  2. nah... saya sama adik saya 3 orang kalu pigi skul atau pulang skul atau kena suru pigi kadai selalu juga betapuk dalam semak kalau ada lori, bulldozer, kapiting, sama gerida limpas. pasalnya takut soge'eh la.

    ReplyDelete
  3. Illie...aiso...gila butul bah dulu2..kitaurang sumua katakutan sama tu soge'eh tu..sana sini urang becerita ada banyak mayat teda kapala..lain lagi itu pakistan jual kain pun banyak...pigi rumah urang..panggil2 'mamah...mamah...mau bili kain?!!!" hihihi

    ReplyDelete
  4. This comment has been removed by the author.

    ReplyDelete
  5. sya lagi la panakut masa sekolah rendah dulu... di kowe'egan kunun rumah dia tu soge'eh... apa lagi paling sya trauma la kawasan sana.. Naik kurita ramai2 lalu tu kawasan sana pun 'bagagar' jantung... kiri kanan la sya meningu hutan.

    kalau pigi sikulah, banyak masa sya habiskan masa betapuk juga pasal soge'eh dan panakut sama tu luging, kopiting,mordusa... sampai2 sikulah selalu la comot sya nadagan batapuk.. sikit-sikit batapuk. Ada dengar kurita bukan lagi balari, main buang badan ja inda meningu lagi tempat membuang badan tu apa da di sana.. lumpur ka, lupak ka.. air ka... nah, bayangkan la pegi sekolah dan balik sekolah adamasanya sya begitu comot..

    satu lagi.. bikin tau itu pangait a bukan ialah

    1. apa sajau kurita ka, luging ka... kalau no plat dia ada dua A contohnya SAA9873.. HAH! itulah pengait tu dorang bilang.. apa lagi kalau pigi pekan tandek lama dulu2 atau keluar dari sekolah.. sana la sya bediri di pagar monoyinu kereta yang ada tulis SAA... apa lagi abis buku latihan sya mencatat no kurita yg SAA.. aina banyak juga. Tujuan catatan sya itu, nanti lain kali tejumpa no tu, buli 'buang badan' batapuk. hahaha... Kana rotan sya yoooong oleh beliau sya (mendiang) pasal mencunting buku.. pa lagi bila bapa merutan ada satu kali setiap kali dia libas rotan dia bilang SAA! (libas lagi) SAA!.. teda guna pigi sikulah begitu!!.. (rotan lagi)

    2. Tengok urang yang bawa bungkusan kain dia pikul2 di belakang. kalau ada merah, itu kepala yg sudah kena potong... adeehhh!! pa lagi sya nie... semua org sya tingu ada bawa bungkusan ka teda.. makin2 lagu tejumpa pakistan yg jalan2 jual kain... ainaaaa.... PANGAITTT!!! sya bilang nogi

    ada beberapa urang yng sya anggap pangait masa tu... korang ingat sepa? hah.. ni sya bagitau la... Si Layang sama si Nua yg suka main katam2 tu.. apa lagi ni si Nua yg suka nakal kajar budak di kowe'egan.. makin la. Ketua soge'eh kami bilang. haha c James yg bekas pulis tu pun pernah sya anggap pangait... haha

    adeehh... kuat juga ni penangan PANGAIT! haha...

    ReplyDelete