Friday, February 20, 2009

Kenangan Malam Tahun Baru

Dulu-dulu ada kaparcayaan urang kampung kita, malam taun baru misti mau mandi. Sia masi lagi ingat mama sia mengasi bangun kami tangah2 malam, pigi mandi talaga..mau buang sial kunun. Ramai urang pigi mandi di sungai2 oboh...ai naa...siuk bah pula. Aramatie...Macam2 bah patua mau buang sial. Ada yang mandi, misti kono mambuang seluar dalam atau pun santut @ Larut. Inda tau la pula, sama ada mimang 'sial' banyak begumpul di santut? Macamana la kalau santut yang mahal itu? Kalau yg elken punya itu...ribu2 lemon harga dia, mau kah kamurang kasi hanyut di sungai? Hehehehe ....Kalau siaurang sakaluarga biasanya mandi saja sana talaga. Nga inda sia tahan mau tunggu tu pukul 12 tghmalam. Sia ingat lagi mama sia kasi posik kami. Campur2 libabaan..pigi la kami talaga. Tarus mama sia siram kapala kami!!! Ai yuh...sajuknya. Tahun lain, mama sia kasi isi air itu besen basar (besen bikin kasi minum sapi/karabau), supaya capat, kami kasi tolop saja kapala kami dalam besen. Inda sah bah mandi buang sial kalau kapala inda basah. Lain la pula sekarang. Pasang bunga api, ada konset2...Paling teda siaurang duduk di rumah seja...tingu tb. Kalau di KL malam taun baru banyak anak dara sama anak taruna yang "tuuuuutttt" Baik2 la kita sumua....

3 comments:

  1. perhatian jangan mambuang seluar dalam kedalam telaga k.. ha ha ha..

    ReplyDelete
  2. waaaarghahahahaha. buli tahan ooo... santut sa dulu sampai kuyak keluar gatah dia pun masi pakai. kalu buang kompom la teda santut suda. bukan sija nampak suda tu gatah, tapi ada banyak bintik2 hitam mcm taik lalat kah kah kah. apa kaitu.... kupang? nah... kalu itu baru ngam buang o kan hehehe

    ReplyDelete
  3. sya masih ingat dalam hidup sya ada satu kali ja yg sya ikut beliau sya pegi sungai tingkalanon malam taun baru kasi buan sial. di sana sangat ramai urg mandi... mcm pesta pula... ngam2 jam 12 kaitu, sumua tumolop mandi, buang sial...

    mcm itu acara tahunan di tingkalanon awal 60-an sampai 80-an. mcm teda sudah dibuat tahun 1990 sampai skarang...

    ReplyDelete